uzbek futboli

Боинг-757 самолёти Дубай аэропортига қўнганида, ўзининг бойлиги ва суперзамонавий иншоаатлари ҳамда тижоратчилик ва иқтисодий йўналишларда донг таратган Дубай шаҳрининг маҳаллий вақти 14:30да кўрсатарди.

Парвоз ҳамма учун аъло даражада кечди. Делегациямиз бортида бўлган барча, энг асосийси футболчилар «Uzbekistan Airways» журналининг навбатдаги сонини ўз қўлларига олишар экан, уни юзларида табассум ила мутоаала қилиб кетишди. Боиси юзга яқин саҳифада чоп этиладиган ушбу журналнинг тўлиқ етти саҳифаси “Бунёдкор” клубига бағишланган бўлиб, клуб ҳақида батафсил маълумотлар берилган. “БУ ИНТИЛУВЧАН “БУНЁДКОР” сарлавҳаси остида чоп этилган мақолани ўқиб, делегациямиз аъзолари Дубайга аъло кайфият билан етиб келишди.

Аввалдан режалаштирилганидек, жамоа аъзолари JW MARRIOTT отелига, фан-клуб аъзолари ва журналистлар San Marco меҳмонхонасига жойлашишди.

Маҳаллий вақт билан соат 19:00да “Ал-Шабаб” уй учрашувларини ўтказадиган “Мактум бин Рашид” мажмуасидаги машғулот майдонларининг бирида (бундай майдонлардан 6-7та бор) “қалдирғочлар” шуғилланишди.

Машғулот ва кечки овқатдан сўнг, футболчиларимизда рақибимизнинг БАА чемпионатидаги сўнгги тур учрашувини ТВ орқали томоша қилиш имконияти пайдо бўлди. Dubai Sports канали орқали 14 март куни кечган “Ал-Шабаб” – “Ал-Халиж” учрашуви такроран олиб кўрсатилаётганди. Учрашувда йирик – 6:0 ҳисобида муваффақият қозонган бразилиялик Тониньо Серезо шогирдлари ушбу ғалабадан сўнг бирданига тўртинчи поғонага кўтарилиб олишди.

Бугун маҳаллий вақт билан 11:30да клубнинг маъмурий биносида иккала жамоа вакиллари иштирокида ўйинолди матбуот анжумани бўлиб ўтади.

Эслатиб ўтамиз, “Ал-Шабаб” – “Бунёдкор” учрашуви 18 март, чоршанба куни Дубайдаги «Мактум бин Рашид» стадионида Тошкент вақти билан 21:30да бошланади.